नायगरा

मी टिपलंय त्याला माझ्या अचंबित नजरेतून 

अन हातातल्या कॅमेऱ्यातून 

पण तो टिपताच येत नाही मला 

माझ्या शब्दातून 

प्रचंड, भव्य, सुंदर या शब्दात तो सामावत नाही 

अन विस्फारलेल्या डोळ्यांच्या कक्षेत तो मावत नाही 

अर्धचंद्राकार कोसळत असलेल्या अनेक धारा 

जलराशीचा तो पसारा कुठे लोपत असेल सारा ?

त्याचे टपोरे लखलखीत थेंब

जणू चमचमत्या हिऱ्यांची उधळण 

उसळत्या तुषारांची अंगभर शिंपण 

भुरभुरणाऱ्या जलतुषारातून शुभ्र तलम धुक्याचा आभास 

जलराशीचे हे नवेच आविष्कार सुखावून जाती मनास 

नायगरा, हा तुझा बेधुंद बेभान
अन भव्य असीम विस्तार
थक्क मी पाहते हे जलवैभव अपार