नाही खऱ्याची दुनिया ही तर
नाही खऱ्याची दुनिया
खोटे येथे खरेच भासते
ही तर इथली किमया
ही तर इथली किमया
रस्त्याच्या हलत्या पडद्याने
प्रवास मोठा घडतो
हुकुमी इथला पाऊस हा तर
सरसर झरझर पडतो
पाण्याचे ते लोट वाहती
जणू लाटा उसळत येती
क्षणात भरती क्षणात ओहोटी
उगाच वाटे भीती
मोडतोड गाड्यांची आधी
अपघातहि घडतो नंतर
तयार पडझड घरदाराची
भूकंपही घडतो नंतर
लुटूपुटीच्या जखमा इथल्या
रक्तपात हो खोटा
जखमा नसूनही नायक आपुला
अभिनय करतो मोठा
मजेशीर मुखवटे घालुनि
पात्रे येथे फिरती
त्यांच्यासंगे फोटो घेण्या
सारेही धावती
कल्पनेतले विश्व सजविण्या
केले सारे खास
खोटे आम्हा खरे वाटण्या
केला हा आभास
केला हा आभास
No comments:
Post a Comment